Hvað felst í viðbótarlífeyrissparnaði?
Framlag launþega (hámark 4% af heildarlaunum)
Framlag launagreiðanda (allt að 2% af heildarlaunum)

Skerðast vaxta- eða barnabætur þegar greitt er í viðbótarlífeyrissparnað?
Vaxta- og barnabætur skerðast ekki.

Er hægt að fá sparnaðinn greiddan ef um örorku er að ræða?
Já, við örorku er hægt að fá sparnaðinn greiddan.

Af hverju þarf að greiða í lífeyrissjóð?
Lögum samkvæmt skulu allir launþegar og sjálfstæðir atvinnurekendur greiða í lífeyrissjóð og ávinna sér og sínum þannig réttindi til greiðslu lífeyris við starfslok.

Hvað þarf að lágmarki að greiða í lífeyrissjóð?
Til að öðlast lágmarkstryggingarvernd skal greiða a.m.k. 10% af launum.

Hver er munurinn á lágmarks- og viðbótarlífeyrissparnað?
Allt um fram lágmarkslífeyrissparnað (10%) flokkast undir viðbótarlíferissparnað.

Ætti ég að hefja viðbótarlífeyrissparnað?
Já. Kostir þess að vera með viðbótarlífeyrissparnað eru margir. Má þar nefna mótframlag launagreiðanda, tekjuskattsfrestun, enginn fjármagns-, eigna- né erfðaskattur er greiddur af sparnaðinum. Einnig má líta á viðbótarlífeyrissparnaðinn sem líf- og slysatryggingu þar sem hann greiðist út við andlát eða örorku. (skv. lögum nr. 129/1997). Með því að leggja til hliðar í viðbótarlífeyrissparnaði leggur þú grunninn að meiri lífsgæðum við starfslok sem jafnframt geta verið sveigjanleg.

Hvert er mótframlag launagreiðanda?
Framlag launagreiðanda er á bilinu 1-2%, misjafnt eftir kjarasamningum.

Eru einhverjir gallar við viðbótarlífeyrissparnað?
Við vissar aðstæður getur viðbótarlífeyrissparnaður skert bætur frá almannatryggingum en hjá því ætti að vera hægt að komast. Með því að hefja viðbótarlífeyrissparnað minnka ráðstöfunartekjur en að okkar mati vega kostirnir það fyllilega upp. Þess ber einnig að geta að eignin er bundin til 60 ára aldurs.

Hvernig er útborgun háttað?
Samkvæmt lögum nr. 129/1997 getur rétthafi þegar hann er orðinn 60 ára fengið greiddan lífeyrissparnað með jöfnum árlegum greiðslum á ekki skemmri tíma en 7 árum, eða á þeim tíma sem rétthafa vantar upp á 67 ára aldur.

Hvað gerist við andlát rétthafa?
Samkvæmt lögum nr. 129/1997 fellur innistæða rétthafa til erfingja hans eftir reglum erfðalaga ef rétthafi fellur frá áður en hún er að fullu greidd. Hlut eftirlifandi maka ber að skipta með jöfnum greiðslum á 7 ár eða á þann tíma sem makann vantar á 67 ára aldur við andlát rétthafa. Hlut barns undir 13 ára aldri ber að skipta með jöfnum greiðslum á þau ár sem vantar á að barnið nái 18 ára aldri. Hafi barn náð 13 ára aldri við andlát rétthafa skal hlutur þess greiddur út á 5 árum.

Hvernig fer með útborgun við örorku?
Hlutfall útborgunar vegna örorku er í samræmi við orkutap og getur rétthafi fengið lífeyrissparnað sinn greiddan út með jöfnum árlegum greiðslum á 7 árum.