Skilmálar Sparisjóðsins í Keflavík um yfirdráttarlán

1. gr.
Skilmálar þessir um yfirdráttarlán eru settir á grundvelli tékkalaga nr. 94/1933. Í 4. gr. laganna segir:

„Útgefandi skal hafa til umráða fé hjá greiðslubankanum, er honum sé heimilt, samkvæmt samningi við greiðslubankann, að ráðstafa með tékkum.“

Reikningseiganda er því ávallt skylt að hafa til umráða nægjanlegt fé hjá greiðslubankanum sem hann hyggst ráðstafa af tékkareikningi sínum. Með samningi um yfirdráttarlán heimilar Sparisjóðurinn í Keflavík frávik frá lagareglunni með þeim skilmálum sem hér greinir.

2. gr.
Sparisjóðnum í Keflavík er heimilt að segja yfirdráttarláni og heimild til yfirdráttar upp skilyrðislaust án fyrirvara hvenær sem er eða ógilda slíkt lán eða heimild sjálfkrafa vegna minnkandi lánstrausts lántakanda. Sparisjóðurinn skal tilkynna reikningseiganda um uppsögn láns eða heimildar, sé það mögulegt, en slík tilkynning er ekki gildisskilyrði uppsagnar.

3. gr.
Með sama hætti og greinir í 2. gr. er Sparisjóðnum í Keflavík heimilt hvenær sem er að lækka yfirdráttarheimild reikningseiganda. Tilkynna skal um lækkunina, sé það mögulegt, en slík tilkynning er ekki gildisskilyrði fyrir lækkun yfirdráttarheimildar.

4. gr.
Komi til uppsagnar yfirdráttarheimildar eða lækkunar hennar er reikningseiganda þegar í stað skylt að greiða inn á viðkomandi tékkareikning í Sparisjóðnum í Keflavík nægjanlegt fé svo reikningurinn standi á núlli eða í þeirri fjárhæð yfirdráttar sem Sparisjóðurinn heimilar. Að öðrum kosti gilda almennar reglur um óheimilan yfirdrátt á tékkareikningi, sbr. 4. gr. tékkalaga og ákvæði 2. ml. 5. gr. skilmála þessara.

5. gr.
Reikningseiganda er óheimilt að ráðstafa hærri fjárhæð af tékkareikningi sínum en sem nemur samningsbundnum yfirdrætti, sbr. 4. gr. tékkalaga. Sé fjármunum ráðstafað umfram heimild mun Sparisjóðurinn í Keflavík innheimta skuld sem þannig myndast eftir almennum leiðum, þ.m.t. kostnað vegna umframfærslna (FIT). Reikningseigandi greiðir allan kostnað af innheimtu skuldarinnar. Við þær aðstæður er Sparisjóðnum einnig heimilt að gjaldfella yfirdráttarskuldina.

6. gr.
Viðskiptakjör, vextir og kostnaður af yfirdráttarlánum fara eftir samningi aðila og ákvörðun Sparisjóðsins í Keflavík hverju sinni.

7. gr.
Brot á skilmálum þessum varða gjaldfellingu og fyrirvaralausri uppsögn yfirdráttarheimildar. Sparisjóðurinn í Keflavík áskilur sér rétt til að tilkynna brot á 4. gr. tékkalaga til lögreglu, í samræmi við 73. gr. laganna.